scheduleसोमवार आश्विन ८ गते, २०७५

पार्टी ध्रुवीकरण र एकताः के गर्दैछ नयाँ शक्ति ?

डा. बाबुराम भट्टराई

हामीले सुरु गरेको नयाँ शक्ति मुख्यतः विचारको नयाँपन हो । साथै, व्यक्ति र उमेरको नयाँ पनि हो । दुई वर्षको अनुभवमा हेर्दा न हामी विचारमा नयाँ, न उत्साह र जाँगरमा नयाँ, न उमेरमा नयाँ अर्थात् युवा पुस्तालाई अगाडि सार्नेमा नयाँ हुनसक्यौं ।

मैले जुन सपना देखेको थिएँ, त्यो पूरा भएको मलाई अनुभूति हुँदैन । तर, म कहिले पनि निराश नहुने मान्छे । ४० वर्ष मर्न हिंडेको मान्छे । म कतिपनि निराश छैन । त्यसैले हामी लुम्बिनी गएर एउटा संकल्प गरेका छौं । नयाँ शक्ति बनाई छाड्ने हाम्रो संकल्प हो ।

मैले मेरा पुराना पिंढीका साथीहरुलाई भनेको छु, कि त तपाईंहरु नयाँ बन्नुहोस्, नयाँ विचार अंगाल्नुहोस् र नयाँ जोश, जाँगर र उत्साहका साथ यसमा लाग्नुहोस् । साथ दिनुहोस् । सक्नुहुन्न भने तपाईंहरु बाटो छाडिदिनुहोस् । नयाँ पुस्तालाई म जिम्मेवारी हस्तान्तरण गर्छु । मैले साथीहरुलाई भनिसकेको छु ।

लुम्बिनीपछि तपाईंले हेर्नुभयो भने पुनर्गठित केन्द्रीय कार्यकारीमा कुनै पनि पार्टीको भन्दा बढी हामीले ३५ देखि ४० प्रतिशत युवाहरुलाई समावेश गरिसकेका छौं । मेरो एउटा सपना छ- आगामी दिनमा केन्द्रीय समितिमा ५० प्रतिशत युवा पुर्यारउने । यसले मात्रै नयाँ शक्ति बन्छ भन्ने मेरो विश्वास छ ।

यो भेलाबाट तपाईंहरुले संकल्प गरेर जानुपर्दछ । नयाँ शक्ति बनाउन सकिन्छ । यो नेपालको आवश्यकता हो र तपाईंहरुको पुस्ताको निम्ति त झन अनिवार्य आवश्यकता हो । समृद्धि सम्भव छ भनेको मुख्यतः मैले तपाईंहरुकै पालालाई भनेको हो । मैले मेरै पुस्ताको लागि पनि भनेको हो ।

हिजो अर्थमन्त्रीसँगको भेटमा पनि मैले भनेको थिएँ– तपाईंले समृद्धि ल्याउने हो भने अमूर्त कुरा छाडिदिनुहोस् । तीस वर्षसम्म दुई अंकको आर्थिक वृद्धिदर हासिल गरेर बल्ल तेस्रो विश्वबाट पहिलो विश्वमा पुग्ने योजना बनाउनुभयो भने मेरै पालामा समृद्धि आउँछ । म ८५ वर्षको हुन्छु त्यतिबेलासम्म । बाँच्ने सम्भावना छ आजकल । त्यसर्थ, मेरै जीवनकालमा समृद्धि आउँछ । होइन भने तपाईंहरुले सक्नुहुन्न, छाडिदिनुस् । मैले उहाँलाई भनेको थिएँ ।

डा. बाबुराम भट्टराई

त्यसैले म भन्छु, समृद्धि सम्भव छ । हाम्रै पालामा सम्भव छ । तपाईंहरुको पालामा त अनिवार्य सम्भव छ । यसैलाई केन्द्रमा राखेर हामीले सुरु गरेको अभियानको औचित्य र महत्व बढेर गएको छ । घटेको छैन ।

लुम्बिनी बैठकको निष्कर्ष रहेको छ- विभिन्न उतारचढावको बावजुद पनि नयाँ शक्तिको औचित्य र आवश्यकता पुष्टि भएको छ । आगामी दिनमा यो झन बढेर जान्छ र हामी बनाइछाड्छौं भन्ने हाम्रो संकल्प छ । हामीले आगामी एक वर्षलाई महाधिवेशन वर्ष घोषणा गरेका छौं । यो बीचमा पार्टीलाई सुदृढ गर्ने, हाम्रै बलबुतामा पार्टी बनाउने, त्यसपछि मात्रै विचार मिल्ने शक्तिसँग ध्रुवीकरण गरेर अगाडि बढ्ने भन्ने हाम्रो निष्कर्ष छ ।

हामी स्पष्ट हुनैपर्छ, नयाँ शक्ति पार्टी फेरि यताउता जान्छ, मर्ज गर्छ, के गर्छ भन्ने कल्पनै नगर्नुस् । बाबुराम भट्टराई एक्लै रहेछ भने पनि नयाँ शक्तिको झण्डा उसले उठाइरहन्छ । तपाईंहरु पनि विलकुल दृढ रहनुहोस् ।

यसको अर्थ हामी कसैसँग सहकार्य गर्दैनौं, कसैसँग ध्रुवीकरण गर्दैनौं भन्ने होइन । हाम्रा केही शर्तहरु छन् । पहिलो शर्त, नयाँ बन्नुपर्छ, तेस्रो समाजवादी केन्द्र बन्नुपर्छ । सम्मुनत समाजवादमा आधारित नयाँ शक्ति बन्छ । त्यसमा पुराना शक्तिहरु आफूलाई रुपान्तरण गरेर आउँछन् भने हामी उनीहरुसँग एकताबद्ध भएर जान तयार छौं । तर, हामी कुनै पनि अवस्थामा पुराना शक्तिमा विलिन हुन पटक्कै, कुनै पनि अर्थमा तयार छैनौं । बेलाबखत केही मानिसहरुले नयाँ शक्ति बन्दैन भन्ने गरेको सुनेको छु । कोही कांग्रेसमा जानुपर्छ, कोही एमाले जानुपर्छ, कोही माकेमा जानुपर्छ भन्छन् भने त्यसलाई ठाडै खारेज गर्नुहोला । बाबुराम भट्टराई पुराना शक्तिहरुमा मिसिन कहिले पनि जाँदैन ।

हो, असोज १७ गते एउटा विशिष्ट परिस्थिति बनेकै हो । नयाँ परिवेश पैदा भएको थियो । नयाँ समाजवादी केन्द्र बन्ने सम्भावना हुन्छ भने त्यही शर्त राखेर हामीले एकतावद्ध हुन तयार हुने भनेका थियौं । तर हामीले देख्यौं त्यो अवस्था उनीहरुको होइन रहेछ । त्यो त घिउ बेचुवा र तरबार बेचुवाको खेलजस्तो मात्रै रहेछ । त्यसकारण, त्यसबाट हामी निस्कियौं । फेरि त्यसमा नै फर्कने हाम्रो कुनै पनि सम्भावना छैन । कांग्रेस त झन पछाडि परेको शक्ति, त्यसमा जाने त कल्पनासम्म गर्न सक्दैनौं । त्यसैले आज पनि मुद्दा र एजेन्डा मिल्ने शक्तिसँग सहकार्य र कार्यगत एकता जोकसैसँग हुन सक्छ तर, कुनै पनि पुराना पार्टीमा हामी विलिनीकरण हुन तयार छैनौं । त्यसमा कुनै पनि प्रकारको भ्रम तपाईंहरु नरहनुहोला ।

ध्रुवीकरणका लागि हाम्रा शर्तहरु हुन्छन् । पुराना पार्टीहरुलाई विघटन गरेर नयाँ एउटा सम्मुनत समाजवाद र ५ ‘स’मा आधारित नयाँ समाजवादी केन्द्र बनाउन तयार हुन्छन् भने हामी मिल्न तयार छौं । होइन भने हामी एक्लैले प्रयास गरेर भने पनि हाम्रै जीवनकालमा केही वर्षभित्र नयाँ शक्तिलाई मूर्तरुप दिएर अगाडि बढ्छौं । यो हाम्रो प्रतिवद्धता छ । यसमा हामी सबै स्पष्ट रहनुपर्छ ।

जहाँसम्म हाम्रो अभियान अलि उतारचढावपूर्ण रहँदै आयो भन्ने पनि गरिन्छ । स्वतः नै पार्टी जीवनमा उतारचढावहरु हुन्छन् । हामी त एउटा ठूलो समुद्र पार गर्न ठूलो जहाजमा चढेका थियौं । त्यहाँ केही मुसाहरु पनि प्रवेश गरेका रहेछन् । मुसाहरु जहाज अलिअलि ढलपलायो भने जहाज नै डुब्छ भनेर पहिला नै आफू हामफाल्छन् । ठूलो समुद्र छ, हामफाले पनि म डुब्छु भन्ने उसलाई थाहा हुँदैन । उसले ढलपलाएपछि जहाजबाट हामफाल्यो भने बच्छु भन्ने सोच्छ र झन छिटो डुबेर मर्छ । कतिपय मुसाहरु जहाज अलिकति ढलपलाउनासाथ हामफालेर गए । उनीहरु डुबे । डुबेकै हुन् तिनीहरु । मुसाहरु हामफालेर गए भनेर हामी कति पनि विचलित छैनौं ।

स्वतः नै ठूला मुसा हामफाले पछि साना मुसा पनि हामनफाल्ने कुरा भएन । केही साना मुसाहरु पनि हामफालेर गए । यसको केही असर युवामा पनि पर्यो । यसबाट विचलित नभई यसलाई नयाँ ढंगले पुनर्गठन गरेर लैजाने संकल्प गरेका छौं । युवा साथीहरु यसको मुख्य वाहक बन्नुपर्छ । पहिलो कुरा त युवा विचारमै नयाँ बन्नुपर्छ । विचारमा प्रष्टता भएन भने यात्रा गर्न अप्ठेरो हुन्छ । द्वन्द्वात्मक भौतिकवादमा आधारित आजको २१औं शताब्दी सुहाउँदै एउटा नयाँ विचार निर्माण गरेर त्यसैको जगमा समतामुलक समृद्धिको निम्ति समानुपातिक, समावेशी र सहभागितामुलक लोकतन्त्रमा आधारित समुन्नत समाजवाद नै हाम्रो मुख्य मार्गनिर्देशक सिद्धान्त हुन्छ । त्यसमा प्रष्टता पहिलो शर्त हुनुपर्छ । त्यसमा प्रष्टता भएन भने फेरि मुसा प्रवृत्ति हामीमा आउँछ र अलिकति दुःख कष्ट हुनासाथ हाम फाल्ने र पलायन हुने स्थिति आउँछ । त्यसैले वैचारिक प्रष्टतामा हामीले जोड दिनुपर्छ ।

दोस्रो कुरा भनेको इमान्दारिता र क्रियाशीलता हो । त्यो युवाहरुमा स्वभाविकरुपमा हुन्छ । जब मान्छे बुढोपाको हुँदैजान्छ, तब ऊ अलि लोभीपानी हुनथाल्छ । हार्छ, थाक्छ अनि मान्छेमा थोरै लोभ र पाप पलाउन थाल्छ । युवा अवस्थामा यस्तो कमजोरी कम हुन्छ । म आफैंले अनुभूति गरेको कुरा हो यो । यसकारण, युवाहरु लोभलालचबाट बच्नुपर्छ । अलि ढाँटछल, लोभलालच र ठगठाग गर्नेगरी जानुभयो भने त्यसले जीवन बर्बाद गर्छ । त्यसकारण, विचारको प्रष्टता, इमान्दारिता र क्रियाशिलता जस्ता गुणले लैस भएर तपाईं अगाडि बढ्नुभयो भने कसैले पनि परास्त गर्न सक्दैन । भोलिको नेपाल तपाईंहरुले नै नेतृत्व गर्ने हो ।

युवा साथीहरुलाई म अर्को सल्लाह दिन चाहन्छु । तपाईंहरु अलि क्रियटिभ पनि बन्नुहोस् । हिजोको कम्युनिष्ट पार्टीको जस्तो माथिको आदेश पर्खन आवश्यकता छैन । हामी संघीयतामा गइसकेका छौं । तलका सबै अंग कार्यकारी बनिसकेका छन् । एउटा विचार र नीतिको परिधिभित्र रहेर हामीले हाम्रा सबै संगठनहरुलाई कामकारबाहीको स्वायत्तता हामीले दिइसकेका छौं । अब युवाहरुले आफैं क्रियाशील भएर आफ्ना योजनाहरु बनाउन सक्नुहुन्छ ।
त्यसरी नै युवाहरु तत्कालीन घटनाहरुमा क्रियाशील हुनुपर्छ । यतिधेरै घटना घटिरहेका छन् । बेरोजगारीको यतिधेरै समस्या छ । भ्रष्टाचारका यतिधेरै काण्डहरु भइरहेका छन् । देशको राष्ट्रियतामाथि यति ठूलो खेलवाड भइरहेको छ । यस्ता मुद्दाहरुमा तपाईं बोल्नु पर्छ । वैकल्पिक राजनीतिको मेरुदण्ड युवा शक्ति नै हुन् । युवा साथीहरुलाई शुभकामना !

प्रतिकृया लेख्नुहोस्:

सम्बन्धित शीर्षकहरु

आजको लोकप्रिय

NTC
Vianet
Sajhajob